Panch Sutra पंच सूत्रस्य प्रथम सूत्र  

(चिरन्तनाचार्यविरचितं)

पाप प्रतिघात गुण बीजाधान सूत्रम्

णमो वीअरागाणं सव्वण्णूणं देविंदपूइयाणं जहट्ट्ठिअवत्थु-वाईणं तेलुक्कगुरूणं अरुहंताणं भगवंताणं.

जे एवमाइक्खंति-इह खलु अणाई जीवे, अणाइजीवस्स भवे अणाइ-कम्मसंजोग-निवत्तिए, दुक्खरूवे, दुक्खफले, दुक्खाणुबंध…१ एअस्स णं वुच्छित्ती सुद्धधम्माओ, सुद्धधम्मसंपत्ती पावकम्मविगमाओ, पावकम्मविगमो तहाभवत्ताइभावओ.

तस्स पुण विवागसाहणाणि १ चउसरणगमणं २ दुक्कडगरिहा ३ सुकडाण सेवणं, अओ कायव्वमिणं होउकामेण सया सुप्पणिहाणं भुज्जो भुज्जो संकिलेसे तिकालमसंकिलेसे 3

जावज्जीवं मे भगवंतो परमतिलोगनाहा अणुत्तरपुण्ण-संभारा खीणरागदोसमोहा अचिंतचिंतामणी, भवजलहि-पोआ, एगंतसरणा अरहंता सरणं…४

तहा पहीणजरामरणा, अवेयकम्मकलंका, पणठवाबाहा, केवलनाणदंसणा, सिद्धिपुरनिवासी, निरुवमसुहसंगया, सव्वहा कयकिच्चा, सिद्धा सरणं…५

तहा पसंतगंभीरासया, सावज्जजोगविरया, पंचविहायार-जाणगा, परोवयारनिरया, पउमाइनिदंसणा, झाणज्झयण-संगया, विसुज्झमाणभावा साहू सरणं…६

तहा सुरासुरमणुअपूइओ, मोहतिमिरंसुमाली, रागद्दोस विसपरममंतो, हेऊ सयलकल्लाणाणं. कम्मवणविहावसु, साहगो सिद्धभावस्स, केवलिपण्णत्तो धम्मो जावज्जीवं मे भगवं सरणं…७

सरणमुवगओ अ एएसिं गरिहामि दुक्कडं. जं णं अरहंतेसु वा, सिद्धेसु वा. आयरिएसु वा, उवज्झाएसु वा, साहूसु वा, साहुणीसु वा, अन्नेसु वा, धम्मट्ठाणेसु माणणिज्जेसु पूअणिज्जेसु तहा, माईसु वा, पिइसु वा, बंधूसु वा, मित्तेसु वा, उवयारीसु वा, ओहेण वा जीवेसु, मग्गट्ठिएसु अमग्गट्ठिएसु मग्गसाहणेसु अमग्गसाहणेसु जं किंचि, वितहमायरिअं अणायरिअव्वं अणिच्छिअव्वं पावं पावाणुबंधि, सुहुमं वा, बायरं वा, मणेण वा, वायाए वा, कायेण वा, कयं वा, काराविअं वा, अणुमोइअं वा, रागेण

दोसेण वा, मोहेण वा, इत्थ वा जम्मे जम्मंतरेसु वा, गरहिअमेअं दुक्कडमेअं उज्झिअव्वमेअं, विआणिअं मए, कल्लाणमित्तगुरुभगवंतवयणाओ, एवमेअं ति रोइअं, सद्धाए, अरिहंतसिद्धसमक्खं, गरिहामि अहमिणं दुक्कडमेअं उज्झियव्व-मेअं इत्थ मिच्छामि दुक्कडं, मिच्छामि दुक्कडं, मिच्छामि दुक्कडं…८

होउ मे एसा सम्मं गरिहा, होउ मे अकरणनियमो, बहु-मयं ममेअं ति इच्छामो अणुसट्ठि अरहंताणं भगवंताणं गुरूणं कल्लाणमित्ताणं ति.

होउ मे एएहिं संजोगो, होउ मे एसा सुपत्थणा, होउ मे इत्थ बहुमाणो, होउ मे इओ मुक्खबीअंति…९ पत्तेसु एएसु अहं सेवारिहे सिआ, आणारिहे सिआ, पडिवत्तिजुत्ते सिआ, निरइआरपारगे सिआ…१०

 

संविग्गो जहासत्तिए सेवेमि सुकडं, अणुमोएमि सव्वेसि अरहंताणं अणुट्ठाणं, सब्बेसि सिद्धाणं सिद्धभावं, सव्वेसि आयरियाणं आयारं, सव्वेसिं उवज्झायाणं सुत्तप्पयाणं, सव्वेसिं साहूणं साहुकिरिअं, सव्वेसिं सावगाणं मुक्खसाहणजोगे, सव्वेसि देवाणं, सव्वेसिं जीवाणं होउकामाणं कल्लाणासयाणं मग्ग-साहणजोगे…११

होउ मे एसा अणुमोअणा, सम्मं विहिपुव्विआ, सम्मं सुद्धासया, सम्मं पडिवत्तिरूवा, सम्मं निरइयारा, परमगुण-जुत्तअरहंताइसामत्थओ, अचिन्तसत्तिजुत्ता हि ते भगवंतो वीअरागा सव्वण्णू परमकल्लाणा, परमकल्लाणहेऊ सत्ताणं.

मूढे अम्हि पावे, अणाइमोहवासिए, अणभिन्ने भावओ, हिआहिआणं अभिन्ने सिआ, अहिअनिवित्ते सिआ, हिअपवित्ते सिआ, आराहगे सिआ, उचिअपडिवत्तीए सव्वसत्ताणं सहियं ति इच्छामि सुकडं इच्छामि सुकडं, इच्छामि सुकडं… १२

एवमेअं सम्मं पढमाणस्स सुणमाणस्स अणुप्पेहमाणस्स सिढिलीभवंति परिहायंति खिज्जंति असुहकम्माणुबंधा, निरणुबंधे वाऽसुहकम्मे भग्गसामत्थे सुहपरिणामेणं कडगबद्धे विअ विसे, अप्पफले सिआ, सुहावणिज्जे सिआ, अपुणभावे सिआ…१३

तहा आसगलिज्जंति परिपोसिज्जंति निम्मविज्जति सुह-कम्माणुबंधा, साणुबंधं च सुहकम्मं, पगिट्ठं पगिट्ठभावज्जिअं नियमफलयं सुपउत्ते विअ महागए सुहफले सिआ, सुहपवत्तगे सिआ, परमसुहसाहगे सिआ, अओ अपडिबंधमेअं असुह-भावनिरोहेणं सुहभावबीअं ति, सुप्पणिहाणं सम्मं पढिअव्वं, सम्मं सोअव्वं, सम्मं अणुप्पेहिअव्वं ति…१४

नमो नमिअनमिआणं परमगुरुवीअरागाणं, नमो -नमुक्कारारिहाणं, जयउ सव्वष्णुसासणं, परमसंबोहीए सुहिणो भवंतु जीवा, सुहिणो भवंतु जीवा, सुहिणो भवंतु जीवा, जीवा 

इति पावपडिधायगुणबीजाहाणसुत्तं समत्तं…१५ (१)

Panch Sutra पंच सूत्रस्य प्रथम सूत्र  

अन्य जैन स्तोत्र संग्रह

श्रीशान्तिधारा पाठः