Shatrunjay Laghu Kalp शत्रुंजय लघुकल्प
अईमुत्तय केवलिणा, कहिअंसेत्तुंजतित्थमाहप्पं,
नारयरिसिस्स पुरओ, तं निसुणह भावओ भविआ. 1
सेत्तुंजे पुंडरिओ, सिद्धो मुणिकोडिपंचसंजुत्तो;
चित्तस्स पुण्णिमाए, सो भण्णइ तेण पुंडरिओ…. 2
नमि विनमि रायाणो, सिद्धा कोडीहिं दोहिं साहूणं;
तह दविडवालिखिल्ला, निव्वुआ दस य कोडीओ. 3
पज्जुन्न संबपमुहा, अद्भुट्ट्ठाओ कुमारकोडीओ;
तह पंडवा वि पंच य, सिद्धि गया नारयरिसी य. 4
थावच्चासुय सेलगा य, मुणिणो वि तह राममुणी;
भरहो दसरहपुत्तो, सिद्धा वंदामि सेत्तुंजे………… 5
अन्नेवि खवियमोहा, उसभाइ विसालवंससंभूआ;
जे सिद्धा सेत्तुंजे, तं नमह मुणी असंखिज्जा. 6
पन्नासजोयणाई, आसी सेत्तुंजवित्थरो मूले;
दसजोयण सिहरतले, उच्चत्तं जोयणा अट्ठ. 7
जं लहइ अन्नतित्थे, उग्गेण तवेण बंभचेरेण;
तं लहइ पयत्तेणं, सेत्तुंजगिरिम्मि निवसंतो. 8
जं कोडिए पुण्णं, कामिय आहारभोईया जे उ;
तं लहइ तत्थ पुण्णं एगोववासेण सेत्तुंजे. 9
जं किंचि नामतित्थं, सग्गे पायालि माणुसे लोए;
तं सव्वमेव दिठं, पुंडरिए वंदिए संते. 10
पडिलाभंते संघ, दिट्ठमदिट्ठे य साहू सेत्तुंजे,
कोडिगुणं च अदिट्ठे, दिट्ठे अ अणंतयं होइ. 11
केवलनाणुप्पत्ती, निव्वाणं आसि जत्थ साहूणं;
पुंडरिए वंदित्ता, सव्वे ते वंदिया तत्थ. 12
अट्ठावयसम्मेए, पावा चंपाइ उज्जंतनगेय;
वंदित्ता पुण्णफलं, सयगुणं तंपि पुंडरिए. 13
पूआकरणे पुण्णं, एगगुणं सयगुणं च पडिमाए;
जिणभवणेण सहस्सं-णंतगुणं पालणे होइ. 14
पडिमं चेइहरं वा, सित्तुंजगिरिस्स मत्थए कुणई;
भुत्तूण भरहवासं, वसइ सग्गे निरुवसग्गे. 15
नवकार पोरिसीए, पुरिमड्ढेगासणं च आयामं;
पुंडरियं च सरंतो, फलकंखी कुणइ अभत्तठं. 16
छट्ट्ठट्ठमदसमदुवालसाणं, मासद्धमासखवणाणं;
तिगरणसुद्धो लहई, सित्तुंजं संभरंतो अ. 17
छठेणं भत्तेणं, अपाणेणं तु सत्त जत्ताइं;
जो कुणइ सेत्तुंजे, तइयभवे लहइ सो मुक्खं. 18
अज्जवि दीसइ लोए, भत्तं चइऊण पुंडरियनगे;
सग्गे सुहेण वच्चइ, सीलविहूणोवि होऊणं. 19
छत्तं झयं पडागं, चामरभिंगारथालदाणेणं;
विज्जाहरो अ हवइ, तह चक्की होइ रहदाणा. 20
दस वीस तीस चत्ताल, पन्नासा पुप्फदामदाणेण;
लहइ चउत्थछट्ठट्ठम-दसमदुवालसफलाई. 21
धूवे पक्खुववासो, मासक्खमणं कपूरधूवम्मि;
कित्तिय मासक्खमणं, साहू पडिलाभिए लहइ. 22
न वि तं सुवन्नभूमि-भूसणदाणेण अन्नतित्थेसु;
जं पावइ पुण्णफलं, पूआन्हवणेण सित्तुंजे. 23
कंतार चोर सावय-समुद्ददारिद्दरोगरिउरुद्दा;
मुच्चंति अविग्घेणं, जे सेत्तुजं धरन्ति मणे. 24
सारावलीपयन्नग-गाहाओ सुअहरेण भणिआओ;
जो पढई गुणइ निसुणइ, सो लहइ सित्तुंज्जत्तफलं. 25
Shatrunjay Laghu Kalp शत्रुंजय लघुकल्प
अन्य जैन स्तोत्र संग्रह